ЖОЛТА ПОТЕРНИЦА: Со помош на Интерпол ќе ја бараат Данка Илиќ
Продолжува потрагата по исчезнатото девојче од Бор. Интерпол распиша жолта потерница по исчезнатата Данка Илиќ, објави на социјалните мрежи претседателот на Центарот за исчезнати и злоставувани деца, Игор Јуриќ.
На веб-страницата на Интерпол има опис на девојчето, но и дека има бенка на левата надлактица и бенка на левото уво.
Девојчето исчезна во вторникот во 13 часот и 45 минути во населбата Бањско Поље во Бор, има кафена коса, кафени очи и е висока околу 85 сантиметри. Во моментот на исчезнувањето таа носела маслинесто зелена јакна, виолетови панталони, црни патики.
Денеска на социјалните мрежи и во некои медиуми се појави видео од девојче кое личи на Данка Илиќ. Српското МВР работи на расветлување на околностите поврзани со снимката која се појави од Виена. Тоа е една од многуте траги на кои работат тамошните власти.
Виенската полиција сослушала државјанин на Србија кој живее во главниот град на Австрија, а кој во тој град снимил дете кое личи на Данка.
