Бајден го критикува Нетанјаху поради судските реформи во Израел
Американскиот претседател Џо Бајден телефонски му се јави на израелскиот премиер Бенјамин Нетанјаху во неделата и ја изрази својата загриженост поради планираната реформа на израелската влада во правосудниот систем, што предизвика масовни протести низ Израел.
Во соопштението на Белата куќа се вели дека Бајден ја повторил загриженоста на САД за мерките кои го поткопуваат одвојувањето на правдата од политичкиот систем на земјата и повикал на компромис. Иако во изјавата разговорот беше опишан како отворен и конструктивен, засега нема индикации дека Нетанјаху се предомислил откако го одбил компромисот што го понуди израелскиот претседател минатата недела.
Во неделата, Нетанјаху рече дека судските реформи ќе бидат спроведени одговорно и истовремено заштитувајќи ги основните права на сите Израелци. Неговата влада, најдесничарската во историјата, вели дека реформата има за цел да ја поправи нерамнотежата што им дава на судовите премногу моќ и го спречува законодавниот дом да ја спроведе волјата на гласачите.
Но, критичарите велат дека реформата ќе ја наруши рамнотежата во деликатниот политички систем на Израел и ќе ја турне земјата кон авторитаризам.
Противниците на намерите на власта организираа големи протести во земјата, во кои беше вклучена дури и армијата. Повеќе од 700 елитни војници од воздухопловните сили и специјалните сили и од Мосад изјавија дека ќе престанат да волонтираат за служба.
