Електродистрибуција инвестираше 10,4 милиони евра во првото полугодие: Поставени 135 километри нова мрежа за постабилно снабдување со струја
Со вкупна инвестиција од 10,4 милиони евра, компанијата Електродистрибуција во првите шест месеци од 2025 година реализираше повеќе инфраструктурни проекти за модернизација и подобрување на нисконапонската дистрибутивна мрежа низ земјава. Главна цел на овие активности, како што соопштија од компанијата, е зголемување на стабилноста на системот и намалување на загубите на електрична енергија.
Во рамките на проектите, екипите на терен поставиле 135 километри нова нисконапонска мрежа, ги замениле старите столбови и проводници и инсталирале нови уреди за далечинско мерење на повеќе локации.
Од Електродистрибуција најавуваат дека инвестицискиот циклус продолжува, со планирани дополнителни 2 милиони евра за слични проекти до крајот на 2025 година.
„Со овие инвестиции, Електродистрибуција ја зајакнува дистрибутивната мрежа и поставува уште постабилна основа за понатамошен развој на енергетскиот систем“, се вели во соопштението.
