Експлозија во трговско пристаниште на југот на Иран: 25 загинати и стотици повредени

Најмалку 25 загинати и стотици повредени е билансот од експлозијата што вчера го потресе најголемото трговско пристаниште на југот на Иран, соопштија денеска иранските медиуми.

„Најмалку 25 лица загинаа“, пренесе агенцијата Тасним, повикувајќи се на шефот на судските власти во јужната провинција Хормозган, каде што се наоѓа пристаништето Шахид Раџаи.

Државната телевизија претходно денеска јави дека најмалку 18 лица загинале, а 800 се повредени. Новинар на телевизијата јави дека „пожарот е под контрола, но сè уште не е целосно изгаснат“, известувајќи од местото на настанот.

Експлозијата и последователниот пожар се случиле вчера околу пладне во важната трговска лука Шахид Раџаи, во близина на големиот град Бандар Абас, кој излегува на Ормускиот теснец низ кој поминува една петтина од светското производство на нафта.

Претседателот Масуд Пезешкијан наредил да се утврди причината за катастрофата.

Според соопштението на државната телевизија, несреќата најверојатно била предизвикана од пожар во складиште со опасни и хемиски супстанции.

„Њујорк Тајмс“ пренесе дека експлозијата била предизвикана од натриум перхлорат, супстанција што се користи во составот на цврстото гориво за ракети. Американскиот весник се повикал на неименуван извор од Чуварите на револуцијата, идеолошката војска на Иран.

Пожарникарските екипи цела ноќ се бореле со пожарот, кој зафатил и бројни контејнери во пристаништето.

Ударниот бран од експлозијата бил толку силен што најголемиот дел од зградите во пристаништето биле тешко оштетени, соопшти новинската агенција Тасним.

Националната компанија за дистрибуција на нафта, сепак, информираше дека нафтените инсталации не се оштетени и дека работат „нормално“.