Екс градоначалникот Жика Стојановски ќе го менаџира хотелот „Белви“
АД Македонијатурист го назначи поранешниот четирикратен градоначалник на Илинден, Жика Стојановски, за в.д. директор на хотелот „Белви“ кој се наоѓа во истата општина која што гравитира кон Скопје.
Стојановски во изминатите четири мандати стана еден од најпопуларните градоначалници во земјата и неформален „експерт за локален развој“. Во неговата ера општината доживеа огромен развој со најверојатно најголем број на продадени градежни парцели на инвеститори од земјата и странство
Стојановски од средината на месецов е ангажиран од сопственикот „Македонијатурист“ на местото на досегашниот привремен директор Јовче Димов. Тој во меѓувреме „остана без работа“ откако на последните локални избори во 2021 не успеа да го добие петтиот мандат, најмногу поради тоа што беше дел од групата која се побуни против раководството на ВМРО-ДПМНЕ и остана без партиската поддршка. Актуелен градоначалник на Илинден е Александар Георгиевски.
Останува времето да покаже дали ова кадровско решение е правилен потег на „Македонијатурист“ и кој е заемниот интерес во договорот постигнат помеѓу двете страни. И хотелот, кој се уште има огромен потенцијал, како и самиот Стојановски се од истата општина која сообраќајно се наоѓа на најпрометниот дел од земјата.
„Македонијатурист“ изминатите денови ги објави своите извештаи за работењето на берза, каде може да се види дека од сите активни хотели кои ги поседува, инвестициски убедливо најмногу вложува во „Холидеј Ин“, а потоа во „Белви“ и „Карпош“. Акционерското друштво изминатата година остварило приходи од безмалку 7 милиони евра, иако добар дел од нив се од вложувања во хартии од вредност, што е за 28,25 отсто повеќе во однос на една година претходно. Порастот на приходите од ноќевањата е зголемен за 52,41 отсто.
Стојановски во „цунамито“ во 2017 беше еден од ретките градоначалници на ВМРО-ДПМНЕ што победи на локалните оизбори, но го следеа и контроверзи. Во 2018 во езерце од ископана дупка за темели за изградба на станови се удави 13-годишно дете, по што се испостави дека општината до тој момент немала издадено одобрение за градба, ниту е почната процедура за издавање, според информации од Обвинителството кои тогаш ги објавија медиумите. На површина од 28 хектари, со опфат на 500 парцели за изградба на семејни куќи, се ветуваше нова населба „Јака“ за млади брачни парови, но со години немаше основни услови за живеење.
А.К.
