Економски шок: Аргентина ја слабее вредноста на својата валута во корист на доларот, новиот претседател прави длабоки јавни кратења

Новата влада на Аргентина ќе ја девалвира нејзината валута за повеќе од 50 отсто во однос на американскиот долар.

Тоа е дел од „терапијата со економски шок“, а претседателот Хавиер Мајли вели дека земјата мора да се справи со својата најлоша криза во последните децении.

Министерот за економија Луис Капуто најави длабоки кратења на јавната потрошувачка.

Тие вклучуваат намалување на субвенциите за гориво и транспорт и замрзнување на трошоците за некои големи владини договори и реклами.

Капуто рече дека по преземањето на функцијата ја наследил најлошата економска ситуација во историјата на Аргентина и дека презема чекори за да избегне хиперинфлација.

– Ќе ни биде полошо од пред неколку месеци, особено во однос на инфлацијата. И тоа го велам затоа што, како што вели претседателот, подобро е да се каже непријатна вистина отколку пријатна лага, рече тој.

Цените во Аргентина се зголемени за околу 150 отсто во последната година. Земјата се бори и со високиот национален долг, додека 40 отсто од населението живее под прагот на сиромаштија.

Од 2019 година, Аргентина ја одржува својата валута вештачки силна со строга контрола врз движењата на валутата.

Новоизбраниот претседател водеше кампања со ветување за длабоки кратења на трошоците и е познат по тоа што користи моторна пила на митинзи за да ги демонстрира своите намери да ги намали владините трошоци.