Една жена и нејзината ќерка загинаа во израелски воздушен напад во јужен Либан
Една жена и нејзината ќерка загинаа денеска во израелски воздушен напад врз село во јужен Либан, јави либанската државна новинска агенција (ННА).
Нападот врз селото Мајдал Зун уследи по серијата напади синоќа, вклучително и еден врз упориштето на Хезболах во планината Сафи и друг врз јужниот град Киам, објави Асошиетед прес.
ННА објави дека е убиена 40-годишната жена Кадија Салман, а анонимни безбедносни службеници ја идентификувале нејзината седумгодишна ќерка, која подоцна им подлегнала на повредите.
Од нападот на Хамас врз јужен Израел на 7 октомври, кој ја предизвика војната во Газа, либанскиот Хезболах, во знак на солидарност со палестинската исламистичка организација, речиси секојдневно разменува оган со израелската армија на границата.
Во текот на нешто повеќе од четири месеци, најмалку 271 лице загинаа на југот на Либан, главно борци на Хезболах, но и 42 цивили, според Франс прес.
На израелска страна, според армијата, загинале десет војници и шест цивили.
Проиранскиот Хезболах денеска објави дека извршил неколку напади врз позиции на израелската армија.
Еден од тие напади беше и одговор на израелските напади врз пограничните села и домовите на цивилите, се вели во соопштението, во кое не се споменува Мајдал Зун.
Лидерот на Хезболах, Хасан Насралах минатата недела вети дека неговата организација ќе го натера Израел да плати со крв за цивилите убиени во Либан.
Тој го изјави ова неколку дена откако седум членови на исто семејство, меѓу кои една жена и нејзините две деца, беа убиени во израелски напади.
