Еди Рама е зачуден затоа што поранешни лидери на ОВК се обвинети за воени злосторства
Според премиерот на Албанија, Еди Рама поранешните лидери на ОВК „се бореле против етничкото чистење, а денес се во затвор без никакви обвиненија“. Тој вели дека постои можност и украинскиот претседател Володимир Зеленски, да заврши како нив зад решетки.
Рама вели дека е зачуден што „оние што се бореле против бруталниот режим се обвинети за воени злосторства“.
Поранешниот командант на ОВК, Хашим Тачи, обвинет за злосторства во Косово и Албанија, денеска пред судот во Хаг, негираше дека ОВК тргувала со човечки органи на затвореници во 1999 година. Тој повтори дека не е виновен за делата во обвинението.
„Светот сега знае, како резултат на овие процеси, дека немало трговија со органи и дека Жолтата куќа никогаш не постоела“, рече Тачи, пренесува Бета.
Тачи го нарече „застрашувачко“ тврдењето од извештајот на Дик Марти, специјалниот известувач на Советот на Европа, објавен во 2011 година, дека ОВК и тој лично биле вклучени во трговијата со човечки органи.
