Ќе се справиме ли со вирусите за празниците?!
Ќе се спречи ли ширењето на вирусот за време на празниците и зачестените контакти. Ординациите и дневните амбуланти се полни со заболени од респираторен вирус. Лекарите со совети лицата кои имаат инфекции да останат во своите домови и да ги намалат контактите.
Да се намалат контактите, а лицата коишто чувствуваат одредени симптоми да останат во своите домови, е апелот на здравствените работници за време на празниците, откако е регистрирано зголемување на бројот на заболени од респираторен вирус. Особено да се внимава на малите дечиња и на повозрасните, кои се најризична категорија. Раздвиженоста и собирите овој период од годината вообичаено ги полнат ординациите и дневните амбуланти. Од Итната помош потврдуваат дека на дневно ниво се зголемени повиците за помош. Најчесто се јавуваат родители со дечиња со респираторен вирус, но и хронично болни, повозрасни лица.
„Овие празници си го носат своето, тие контакти секако се зголемени, доколку се со инфекција да седат дома не мора да одат, затоа што овие вируси бргу се шират, најзастапено е кај малите дечиња, новороденчиња и кај постарите лица кај нив може да биде и фатален и тие да си останат дома“, вели д-р Валентина Тодоровска Трајковска, Итна помош Куманово.
Лекарите апелираат граѓаните да консумираат повеќе течности, храна богата со витамини. Да се избегнува мрсна храна, и алкохолот да биде во умерени количини. Ширењето на вирусот може да се спречи и со спроведување на заштитните мерки за хигиена, проветрување на простории, но и носење заштитни маски.
И сообраќајниот метеж кој е вообичаен за време на празничните денови бидејќи се враќаат нашите иселеници, предизвика дополнителни проблем во работата на итната медицинска помош. Оттаму апелираат и до возачите и до пешаците, да бидат совесни, да ги почитуваат сообраќајните правила и прописи и да не возат и консумираат алкохол.
Елена Георгиевска | МРТ
