ЌЕ ПЛАТАТ СУМА ОД 1,25 МИЛИЈАРДИ ЕВРА, АМА ОВА ИМ Е СО ПОПУСТ – групирања во модната индустрија: „Прада“ го купува „Версаче“
Компанијата Прада се согласи да го купи модниот бренд Версаче за 1,25 милијарди евра. Версаче е во сопственост на модниот конгломерат Капри Холдингс.
По неколкумесечни шпекулации за потенцијално спојување меѓу двете италијански модни куќи, договорот доаѓа по гласините дека аквизицијата може да пропадне по пресвртот на пазарот како одговор на царинската политика на претседателот Трамп.
Упатените велат дека првичната зделка се очекуваше да биде решена на 1,43 милијарди евра, но беше постигнат попуст од околу 180 милиони евра бидејќи неодамнешните превирања на пазарот и трговската несигурност особено ја погодија малопродажната индустрија.
Капри, кој исто така ги поседува Мајкл Корс и Џими Чу, првично го купи Версаче за 2,1 милијарди долари во 2018 година. Капри беше под притисок да го продаде Версаче за да го намали долгот.
Во изјавата со која се потврдува веста, претседателот и извршен директор на Прада Груп, Патрисио Бертели рече дека групата е „подготвена и добро позиционирана да напише нова страница во историјата на Версаче“. Бертели додаде дека двете компании „споделуваат силна посветеност на креативноста, изработката и наследството“.
Версаче ќе им се придружи на модните брендови Прада и Миу Миу, брендовите за обувки Church’s, Car Shoe и Luna Rossa, едриличарскиот тим на Америка Купот Луна Роса и брендот за пециво Марчеси.
Ова не е прв обид на Прада да го прошири своето портфолио. Во 1999 година, Прада ги купи брендовите Jil Sander и Helmut Lang, а во 2000 година го додаде брендот Alaia во својата група. Сепак, до 2007 година, по низа спорови и финансиски предизвици, таа се раздели со сите три брендови. Сега стекнувањето на Версаче им нуди уште една можност да го интензивираат глобалниот досег на групата.
Додека пазарот на луксузна мода се соочуваше со значително забавување, групата Прада доживеа редок успех. Во 2024 година оствари приход од 5,4 милијарди евра, што е за 17 отсто повеќе од претходната година. Ова зголемување делумно беше поттикнато од брендот Miu Miu, кој речиси го удвои својот профит оваа година, достигнувајќи близу милијарда евра во продажба.
Бонитет.ком
Фото: ЕПА
