ДЗР со неповолно мислење за Државниот архив – утврдени слабости и неправилности
Државниот завод за ревизија (ДЗР) утврдил повеќе слабости и неправилности во работењето на Државниот архив, покажува ревизорскиот извештај објавен денеска.
Во документот се наведуваат слабости во пописот на побарувањата и обврските, неправилности во остварувањето на приходите, како и во давањето попусти и подароци. Констатирани се и исплати на надоместоци без законска основа, плаќање данок на додадена вредност за услуги поврзани со основната дејност, како и слабости во спроведувањето и реализацијата на јавните набавки.
ДЗР изразува неповолно мислење за реалноста и објективноста на финансиските извештаи на Архивот за 2024 година, како и за усогласеноста со законската регулатива, упатствата и воспоставените политики.
Со ревизијата е утврдено и дека не се исполнети основните услови што треба да ги поседуваат депоата за заштита на архивскиот материјал, како и дека постојат слабости во заштитата од неовластен пристап. Дополнително, не било вршено ажурно и хронолошко евидентирање на движењето на залихите на публикуваните изданија.
Во извештајот се потсетува дека ДЗР и претходно вршел ревизија на Архивот. За 2016 година исто така било изразено неповолно мислење, а во 2018 година била спроведена проверка на реализацијата на препораките, при што било констатирано дека трите дадени препораки се спроведени.
Од ДЗР информираат дека од одговорните лица на Државниот архив биле доставени забелешки на Нацрт-извештајот за ревидираниот период. Дел од забелешките не биле прифатени, бидејќи не биле доставени нови докази што би довеле до промена на утврдените состојби, додека дел претставувале појаснувања за причините или најави за мерки што ќе се преземат, вклучително и со донесување на нов Закон за архивски материјал и архивска дејност.
За надминување на утврдените состојби, ревизорите дале препораки со цел преземање соодветни мерки од надлежните лица и органи.
