Двојно убиство го потресе Скопје – влегле со фантомки и им пукале во глава…
Вчера во скопско кафуле лица со огнено оружје пукале кон две лица кои починале на лице место.
Дежурен јавен обвинител заедно со полициски увидни екипи врши увид на лице место.
Од таму информираат дека лицата биле маскирани, а има и повредени.
-Фиксирани се траги на лице место, а јавниот обвинител ги издава сите потребни наредби и насоки со цел да се обезбедат докази кои ќе помогнат за расчистување на настанот и за откривање на идентитетот на сторителите, се вели во соопштението од ЈО.
Од МВР претходно информираа дека во СВР Скопје вечерва во 20.11 часот е пријавено дека во угостителски објект во Скопје неколку лица пукале кон Ј. К. и Е.И., кои починале на лице место, и кон А.Т., кој е пренесен во болница за укажување лекарска помош.
Од Универзитетската клиника за хируршки болести Свети Наум Охридски потврдија дека едно лице со две прострелни рани е донесено во оваа клиника вечерта во 20.15 часот со приватно возило. Констатирана му е прострелна рана во пределот на левото стапало и поголема рана во пределот на десната потколеница.
Како што порачаа, на лицето му е укажана помош и е пуштено на домашно лекување.
Нагласуваат дека досега во оваа клиника е донесено само едно лице.
Од МВР засега нема нови официјални информации и детали, а истите се очекуваат денеска.
