Двегодишно дете на интензивна нега по напад од улични кучиња во Битола

Двегодишно дете се наоѓа на одделот за интензивна нега на Клиниката за детска хирургија во Скопје, откако било нападнато од улични кучиња во близина на својот дом во Битола. Поради сериозноста на повредите, од битолската болница итно било префрлено на скопските клиники.

Директорот на Клиниката за детска хирургија, д-р Лазе Јовчевски, информира дека детето веднаш по приемот било внесено во операциона сала, каде што му биле згрижени раните. Повредите се на лицето, вратот, градниот кош и стомакот. Во моментов детето е во стабилна општа состојба и се лекува на интензивна нега. Применa е антитетанусна профилакса и соодветна терапија.

Според лекарите, времето на заздравување кај вакви повреди е индивидуално. Д-р Јовчевски посочува дека детето имало среќа што најголемиот дел од раните се плитки. Тие се обработени, а како што објаснуваат хирурзите, рани од каснување од куче не се затвораат херметички. Очекувањата се дека исходот ќе биде поволен.

Нападот се случил пред два дена во попладневните часови, додека детето си играло во близина на семејната куќа. Од СВР Битола соопштија дека на 06.02.2026 во 15:53 часот лекар од Клиничката болница Битола го пријавил случајот, откако кај нив било донесено детето со тешки телесни повреди. Потоа било транспортирано во Комплексот клиники „Мајка Тереза“ во Скопје. Полицијата презема мерки за расчистување на настанот.

Инаку пред неколку дена скопјанка беше искасана од глутница кучиња додека трчала на Кејот на Вардар. Таа пријавила дека борбата со кучињата траела околу пет минути и дека добила седум угризи. Помош побарала во болницата „8 Септември“, каде примила тетанус-вакцина.

Според податоците на МВР, од почетокот на годината до сега 109 граѓани од Скопје пријавиле дека биле каснати од кучиња скитници.