Две недели откако се сликаа и испратија со хеликоптер, ФЗО даде негативно мислење за лекување на Леонид во Виена
Пред точно две недели главната вест во медиумите беше првиот меѓународен лет во историјата на Македонија со хеликоптер, со кој за медицинско лекување од Скопје до Виена, Австрија беше транспортиран пациент – младото момче Леонид Индов.
Наместо тоа, за само две недели откако Леонид е во Виена, првостепената комисија од Фондот за здравствено осигурување дала негативно мислење во однос на лекувањето на Леонид во странство, и покрај конзилијарното мислење на докторите кои го препорачале лекувањето и рехабилитацијата. За ова првично соопшти заменик народниот правобранител Јован Андоновски на својот профил на Фејсбук, пишува Мета.мк
„Фондот за здравство и покрај конзилијарното мислење дека лицето мора да се лекува во странство, носи решение со кое се одбива барањето‼️ При тоа, во решението воопшто не се наведува која установа ја нуди потребната услуга, туку само дека лекувањето е можно во Македонија. Државата си игра со човечки живот. Барам ФЗО да ја преиспита одлуката“, напиша Андоновски.
Мета.мк стапи во контакт со таткото на Леонид, Бранко Индов, кој вели дека за неговиот син не постои друга надеж освен лекување и рехабилитација надвор од државата.
Индов минатото лето доживеа тешка несреќа додека беше на патување во Грција, каде ги повреди третиот, четвртиот и петтиот пршлен. Тој итно беше пренесен во Солун каде му беа направени неколку успешни операции, за кои се собираа средства од над 200 илјади евра. Младото момче во моментов дише на апарати и не може да ги движи екстремитетите.
