Две млади жени се уапсени во Иран бидејќи танцувале на улица
Две млади жени се уапсени во Иран по објавувањето на видео на кое тие танцуваат за да го прослават доаѓањето на персиската Нова година, објавија денеска локалните медиуми, цитирани од агенцијата Франс прес.
Во последниве денови, видеото од двете млади жени кои танцуваат во близина на плоштадот Тајриш, популарно место во северен Техеран, стана вирално на социјалните мрежи.
„Техеранскиот обвинител нареди апсење на две жени кои ги прекршиле општествените норми танцувајќи на плоштадот Тајриш“, објави новинската агенција Тасним.
Двете млади жени беа маскирани во Хаџи Фируз, фолклорен лик облечен во црвено, чии танци и песни го најавуваат доаѓањето на Новруз, иранската Нова година, која оваа година започнува на 20 март.
Исламскиот закон во Иран им забранува на мажите да танцуваат со жени или само жените да танцуваат во јавност, соопшти АФП.
Во последниве месеци, бројни видеа од жени кои танцуваат на јавни места, особено во метрото, станаа вирални во Иран по протестното движење што го потресе Иран кон крајот на 2022 година по смртта на 22-годишната иранска Курда Махса Амини, која беше уапсена од страна на моралната полиција за непочитување на строгиот кодекс на облекување на жените во земјата.
