Два собира во Кочани – едниот со молитви, другиот за поддршка на лицата од обезбедувањето!
Вечерва во паркот на Револуцијата во Кочани се одржаа два масовни граѓански собири.
Првиот, под мотото „Слобода за нашите херои“, бараше ослободување на притворените лица од обезбедувањето во дискотеката, кои помогнале во спасувањето на жртвите.
„На овој собир сакаме да изразиме и почит кон оние луѓе кои помагаа да се спасат колку што може повеќе деца. Овде го вклучуваме и возачот Иле во Итната медициснка помош, кој се борел да ги превезе и да ги спаси децата, а подоцна легнал да спие и не се разбудил. Исто така, им благодариме на сите други, меѓу кои се и нашите сопрузи и браќа, дел од нив веќе не се меѓу нас, кои помагале во спасувањето. Ние ги нарековме наши херои затоа што да не беа тие ќе имаше уште многу загинати“, истакна Наталија Ѓоргиева, учесничка на собирот.
Вториот собир, предводен од митрополитот брегалнички Иларион, беше посветен на молитва за спокој на загинатите и оздравување на повредените. Тој ги повика граѓаните да учествуваат во молитвите во храмот „Св. Георгиј“ и на заедничкиот погреб в четврток на Градските гробишта.
„Се молиме на Бога да ги прими душите на починатите во рајските населби кај светителите и ангелите, а сите ние со нашите молитви и мисли да бидеме насочени кон нив и смирено и достоинствено да ги испратиме во вечноста. Исто така, да се помолиме неговата милост да се покаже кон нашите болни, што побрзо да добијат исцеление, побрзо да ни се вратат и да бидеме заедно во овоземниот живот. Да ги утешуваме родителите на починатите, затоа што во ова време ни треба трпение, смирение, покјание и љубов, едни со други да си помогнеме“, истакна митрополитот Иларион.
