Два месеци по одземање на лиценцата, фирмата на Љупчо Пецов – Ѓаволот добила тендер за Пошта
Иако по Љупчо Пецов – Ѓаволот е распишана меѓународна потерница, неговата компанија „Тритерол петрол“ продолжува непречено да добива државни тендери. Според информациите што ги објави телевизија Телма, од 3 ноември 2023 година до денес, фирмата добила вкупно 136 тендери со вредност над 300 милиони денари, односно над 5 милиони евра.
Се работи за јавни претпријатија, училишта, градинки и општини.
Пецов е осомничен за злосторничко здружување и даночна измама во големи размери, како дел од случајот „Синџир“, во кој буџетот бил оштетен за осум милиони евра преку лажни фактури. Иако 22 лица беа обвинети, против Пецов немаше обвинение бидејќи е недостапен за органите на прогонот.
Телма откри дека Пецов неодамна бил забележан во Скопје – посетил нотар и лекар, а Обвинителството обезбедило видео снимки како доказ. Неговиот адвокат, и покрај тоа што Пецов е во бегство, побарал притворот да му биде заменет со поблаги мерки, нудејќи гаранција во имот од еден милион евра.
Иако на компанијата во април ѝ беше одземена лиценцата за трговија со нафтени деривати на големо, таа и понатаму добива договори со државни институции – последниот е потпишан со Македонска пошта во јуни, два месеца по укинувањето на лиценцата.
Пецов и претходно бил инволвиран во финансиски скандали – во 2013 година тој и неговите родители беа осудени во случајот „Керозин“, каде што, преку фирмата „Алма Комерц“, оштетиле државниот буџет за речиси три милиони евра. Тогаш беше осуден на девет години затвор, казна што подоцна му беше намалена на седум.
И покрај сите сомнежи и судски постапки, институциите и понатаму склучуваат договори со компанијата на осомничениот бизнисмен, кој според истрагата, најверојатно се крие во Бугарија.
