Двајца Турци загинаа откако стапнале во уличен вир со струја

Додека бегале од дождот во областа Конак во Измир, 23-годишната Озге Черен Дениз и 44-годишниот Инанч Октемај ги загубиле животите откако добиле струен удар. Неизолиран кабел со струја, што претходно никој не го забележал, низ канализациски одвод се поврзал со уличните вирови низ кои се движеле Турците.

Инцидентот се случи минатиот петок во областа Алсанџак во Конак. Додека обилните врнежи во градот ги претворија улиците и авенијата во езера, Озге Черен Дениз (23) и Инанч Октемај (44) беа зафатени од дожд. 

Ужасната смрт при тоа била снимена од улична безбедносна камера.На снимката се гледаат и локални продавачи кои се обидуваат да помогнат.

Октемај беше погребан во Буча, додека Черен Дениз денеска ќе биде погребана во нејзиниот роден град Османије.