Двајца повредени од „Пулс“ пуштени на домашно лекување, тројца остануваат во болница
Уште двајца од повредените млади лица од пожарот во кочанската дискотека „Пулс“ се пуштени на домашно лекување, додека тројца остануваат на болничко следење – двајца во Македонија и еден во Истанбул. Нивната состојба е тешка, но не е животно загрозувачка. Дополнително, шест пациенти примаат третман во Пирогов во Софија и во Скопје, а неколкумина веќе се пуштени од Клиниката за пластична хирургија. Двајца од пациентите имаат отворени рани, кои се лекуваат во кочанската Болница, информира директорот на Фондот за здравство, Сашо Клековски, кој денеска беше во посета на Општата болница во Кочани.
Клековски додаде дека врвен хирург за пластика од Белгија направил проценка на сите пациенти на кои им е потребна реконструктивна интервенција. Засега, за 18 повредени се утврдено дека е потребна пластична хирургија, но интервенциите се планираат за подоцна.
„Ме радува фактот дека бројот на повредени се намали на тројца. Двајца пациенти се пуштени на домашно лекување, еден се врати од Истанбул и еден од Одделот за пластична хирургија. Во болнички услови се лекуваат еден пациент во Истанбул и двајца во државата. Тие се во тешка состојба, но не критична“, изјави Клековски.
Директорката на Општата болница во Кочани, Катерина Паниќ-Мирчовска, појасни дека двајца пациенти продолжуваат со постојани третмани во болницата, а Фондот за здравствено осигурување финансиски ги поддржува контролите за шест пациенти во Пирогов.
„Веќе сме на прагот на шестте месеци од трагичниот настан и ги следиме сите препораки на специјалистите. Силиконските маски за лице и врат за повредените се изработени со 3Д принтање во Германија и се очекува да пристигнат во наредниот период“, додаде Паниќ-Мирчовска.
Клековски информира дека е зголемен буџетот за Општата болница во Кочани, одобрени се нови 20 вработувања, а наскоро ќе започне и опремувањето на Одделот за физикална терапија. Дополнително, ќе се обезбедат средства за Централното снабдување со кислород во хируршките сали и за набавка на дигитален рентген.
„Голем дел од градежните активности се завршени. Во изминатиот период беа извршени повеќе активности, вклучувајќи комплетна промена на вертикалната канализациска и водоводна мрежа“, појасни Паниќ-Мирчовска.
Инаку, на 20 август заврши рехабилитацијата на повредените од пожарот кои беа во одморалиштето на МВР на планината Пониква.
Во трагичниот пожар во дискотеката „Пулс“ на 16 март годинава загинаа 62 лица, а околу 200 беа повредени.
