ДВАЈЦА МАЛОЛЕТНИЦИ ВО РАДОВИШ ПОТПАЛИЛЕ АВТОБУС Подолго време бил паркиран во училишниот двор
Двајца малолетници синоќа во Радовиш со запалка запалиле автобус кој бил паркиран во дворот на ОУ „Крсте Петков Мисирков“, соопштија денеска од СВР Струмица.
– На 25.01.2026 во 20:30 часот во Полициската станица Радовиш е пријавено дека настанал пожар на автобус паркиран во дворно место на ОУ „Крсте Петков Мисирков“ во Радовиш. Од екипа на Територијалната противпожарна единица Радовиш пожарот е изгаснат, а повредени лица нема. По преземени мерки, полициските службеници утврдиле дека пожарот бил предизвикан од двајца малолетници од Радовиш. Со нив се извршени службени разговори во присуство на родители, при што го признале делото, а воедно е одземена и запалката со која е предизвикан пожарот, се наведува во полициското соопштение.
Се додава дека за настанот е запознаен јавен обвинител од ОЈО Струмица и по документирање на случајот ќе следува соодветна пријава.
Инаку, како што дознава МИА автобусот не бил во употреба и стоел паркиран во дворот на училиштето. Со навремената интервенција било спречено пожарот да се прошири на училишната зграда и на околните станбени згради.
.
