Дурмиши: Економијата е постабилна, граѓаните не се соочуваат со неподносливи поскапувања
На денешната прес-конференција, министерот за економија Бесар Дурмиши се осврна на последните информации за инфлацијата во земјава кои беа објавени од страна на Државниот завод за статистика.
Тој посочи дека пазарниот инспекторат прави контроли и во наредниот период ќе го објави извештајот и дека ќе чекаат да видат дали има голема промена во цените и доколку има ќе бидат воведени нови поригорозни мерки.
-Официјалните податоци покажуваат дека инфлацијата за месец април е практично нула во споредба со март, 0.6% зголемување. Во споредба со април минатата година, инфлацијата изнесува 2,6%. Цените на храната се речиси непроменети – само 0,3% годишен раст, и намалување од -1,3% во споредба со декември 2024. Ова се факти што покажуваат дека економијата е постабилна, и граѓаните не се соочуваат со неподносливи поскапувања. Но, тука нема да застанеме, рече Дурмиши.
Тој истакна дека во соработка со Државниот пазарен инспекторат секојдневно се следи динамиката на цените.
-Досега нема значително зголемување по завршувањето на мерката. Но, доколку некој се обиде да ја злоупотреби ситуацијата ќе реагираме веднаш, рече министерот.
Истакна дека реакцијата ќе биде решителна.
-Можеме да ја прошириме листата на производи со ограничени цени. Да воведеме маржи за сите производи. Или да ги зголемиме постојните ограничувања, изјави Дурмиши.
