ДУИ со предизвик, тој што ќе ги изгуби изборите да се повлече од политика – од ВРЕДИ им порачаа: Изберете нотар и да потпишеме
Министерот за економија Крешник Бектеши денеска даде предлог сите јавно да потпишат договор дека губитниците на претстојните избори ќе ја напуштат политичката сцена.
Овој предизвик на ДУИ следува како одговор на новинарско прашање дали лидерот на ДУИ, Али Ахмети, би се повлекол од партиската функција доколку ДУИ биде поразена на следните избори.
Бектеши е уверен дека неговата партија ќе биде победник во албанскиот блок на парламентарните избори.
„Повикувам да направиме договор, ако сакаат и јавно да потпишеме договор меѓу сите политички парии – тој што ќе изгуби веќе да не се занимава со политика. Ние ја фрламе ракавицата, нека повелат сите политички партии вклучувајќи ja и ВМРО-ДПМНЕ и другите партии. Но, зошто ова не би се случило, затоа што овие т.н. лидери на политички партии – тоа не важи само за македонската опозиција туку и за другите лидери – сите изгубиле избори не еднаш туку повеќепати, само господинот Ахмети никогаш не изгубил и нема да изгуби избори“, изјави Бектеши.
Од коалицијата ВРЕДИ го прифаќаат предизвикот на министерот за економија Крешник Бектеши, кој денеска предложи губитникот од изборите да се повлече од политиката.
„На 24 април и 8 мај Албанскиот народ ќе се потпише на потврдата за политичка пензија на Али Ахмети, Бујар Османи, Артан Груби и нивните соработници. Ваквите блеферски обиди на исплашеното раководство на ДУИ да го сокријат стравот од промените кои ќе се случат, не поминуваат никаде, бидејќи ништо повеќе не зависи од нив.
Меѓутоа, ВРЕДИ нема да дозволи ни најмал простор за сеење магла. Ги повикуваме Али Ахмети, Бујар Османи, Артан Груби да изберат нотар и тајминг каде ќе се потпишеме на изјави дека кој изгуби нема право да се занимава никогаш повеќе со политика“, се вели во соопштението од ВРЕДИ.
