ДУИ: Скопје гори, Изет се чешла!
Демократската унија за интеграција (ДУИ) денеска упати жестоки обвинувања кон првиот вицепремиер и министер за животна средина, Изет Меџити, сметајќи го за директно одговорен за „еколошката катастрофа“ што го зафати Скопје по пожарот во фабриката за рециклирање во Трубарево.
Од опозициската партија го обвинуваат Меџити дека наместо да се занимава со заштита на јавното здравје, тој се појавува на партиски активности и води изборна кампања, додека главниот град е „обвиен со токсични облаци“.
„Парадоксално е тоа што токму Министерството за животна средина, предводено од Меџити, е институцијата што издава дозволи за работа на вакви објекти и има обврска да врши контрола врз нив. Вчера, Изет ги затвори очите пред сопствената одговорност и, како и секогаш, се обиде да најде дежурен виновник во ДУИ“, се вели во реакцијата на ДУИ.
Според нив, ова е дел од воспоставена шема на однесување на Меџити, кој, како што велат, и во минатото секогаш се обидувал вината да им ја префрли на другите, како за „урбаниот хаос што го создаде во Чаир“, така и за други неуспеси.
Од ДУИ, исто така, со иронија го прашуваат министерот кој е виновен за неодамнешните пожари во Битола, Кавадарци, Штип и други градови.
„Јавно го прашуваме уште еднаш г. Меџити: кој ги подметна пожарите во Битола, Кавадарци, во Штип и во другите градови на источна и југоисточна Македонија? Дали и таму виновна е ДУИ?“, стои во соопштението на партијата.
