ДУИ на партиска седница донесе одлука за итни предвремени парламентарни избори
Демократската унија за интеграција (ДУИ) денеска на седница на Централното претседателство едногласно донесе одлука да побара итно распишување на предвремени парламентарни избори.
„Главниот заклучок е јасен и единствен – време е веднаш да се оди на избори“, стои во соопштението на партијата.
ДУИ и коалициските партнери од Националната алијанса за интеграција (НАИ) сметаат дека по три последователни изборни циклуси – претседателски, парламентарни и локални – волјата на граѓаните е недвосмислено изразена и е во поддршка на нивната политичка платформа.
„Во период пократок од една и пол година, граѓаните трипати по ред ѝ ја доверија својата поддршка на Националната алијанса за интеграција, потврдувајќи го нејзиниот статус како неоспорен победник на национално ниво“, наведуваат од партијата.
Според официјалните податоци од последните локални избори, НАИ:
НАИ победи на изборите за совети во повеќе општини, меѓу кои Гостивар, Липково, Сарај, Струга, Студеничани, Бутел, Чашка, Куманово, Карпош, Шуто Оризари, Маврово и Ростуша и други, а во трката за градоначалници обезбеди пет победи – Гостивар, Липково, Врапчиште, Пласница и Чашка – со уште пет општини каде ќе се оди во втор круг.
ДУИ оценува дека ваквите резултати се „јасен сигнал од граѓаните“ и дека секој обид за игнорирање на таа волја е, како што велат, „неразумен и антидемократски“.
„Време е мандатот да им се врати на граѓаните. Народот нека одлучи кој ја има легитимноста да ја води државата и да го продолжи евроатлантскиот пат, еднаквото претставување и стабилноста“, стои во соопштението.
Партијата ја заокружува својата порака со порака до политичките противници:
„ВРЕДИ боледува од синдромот на Газиместан – зборува со патетика, но губи со факти. Ние зборуваме со бројки, резултати и легитимитет. Граѓаните зборуваа јасно – време е политиката да слуша. Ајде, веднаш да одиме на избори!“
