ДУИ лути: Никој во државава не го честиташе Денот на независноста на Косово
Од ДУИ денеска преку соопштение истакнаа дека никој во државава не го честитал Денот на независност на Косово.
Како што велат, со жалење и сериозна загриженост констатираат преседан што се случил оваа година — по првпат, институциите на државата, вклучително Претседателот, Премиерот и Министерот за надворешни работи, не упатија официјална јавна честитка по повод Денот на независноста на Република Косово.
„Овој чин не само што е дипломатски превид, туку и директен сигнал кој го поткопува духот на добрососедство и регионална соработка. Истовремено, со сите државни почести, беше пречекан Милорад Додик — политичка фигура позната по своите деструктивни ставови кон евроатлантските процеси и принципите на регионалната стабилност. Оваа очигледна диспропорција во односот кон соседите испраќа загрижувачка порака за насоката на нашата држава. Таквото однесување е резултат на растечкото влијание на концептот на „Српскиот свет“ во Северна Македонија — проект кој претставува закана за суверенитетот, европската перспектива и стратешките интереси на државата“, велат од таму.
Партијата додава дека промовирањето на оваа идеологија на сметка на пријателските односи со Косово е недозволиво и штетно.
