„Државни патишта“: Утре свечено пуштање во употреба на патот Крива Паланка – Страцин
Јавното претпријатие „Државни патишта“ известува дека од утре граѓаните ќе возат по новиот експресен пат Крива Паланка-Страцин со негово свечено пуштање во употреба.
„Изминатиот период ја забрзавме изградбата и работевме и дење и ноќе и во зимски услови и резулатот е нов, модерен и безбеден експресен пат во должина од 25,5 километри, со дозволена брзина од 110 км на час, пат кој е од големо значење не само за граѓаните од овој регион туку е значаен затоа што е дел од Коридорот 8 кој го поврзува истокот со западот на државата“, информира ЈПДП.
Вкупната инвестициона вредност на експресниот пат изнесува 102 милиони евра – средства обезбедени од Светска банка 88 милиони евра и дел наменски грант во висина од 14 милиони евра обезбедени од Инвестицискиот фонд за Западен Балкан.
На експресниот пат има 3 клучки, исто толку и мостови, 13 вијадукти, 9 надпатници, 44 косини, 36 цевасти пропусти и 14 плочести пропусти. Тој е со ширина од 11,4 м, односно 12,5 метри.
„Оваа делница ќе овозможи развој на трговијата и економските стоки и услуги, ќе овозможи развој на туризмот во регионот, ќе овозможи побрз, побезбеден и сигурен проток на сообраќајот“, додаваат од јавното претпријатие.
