ДРЖАВАТА ЌЕ ГРАДИ СТАНОВИ И ТАКА ЌЕ ГО ЗАПРЕ ОВОЈ ЛУД РАСТ НА ЦЕНИТЕ – директорот на Станбеното прогнозира намалување
Зоран Ѓоргијев, директор на АД за изградба и стопанисување со станбен и деловен простор, денеска изјави дека цената на квадратен метар станбена површина ќе се намалува. Акционерското друштво како регулатор на цената почнува да гради на нови локации, а на намалување на цената ќе влијае и поевтинувањето на градежните материјали.
„Според она како се движат цените сега, има извесно намалување на градежните материјали. Ние како државна фирма сме регулатор на цената. Затоа сега набргу ќе почне градба во старата воена пекарница за да можеме на ова лудило во државата и во целиот регион за цената на квадратен метар да му бидеме некаков регулатор. Мислам дека цените ќе одат во некој благ пад надолу“, рече директорот Ѓоргијев по денешниот настан за увид во градежните работи за изградба на зградата за 312 социјално загрозени семејства во Бутел.
Тој уште и рече дека трендот на енормно зголемени цени за квадратен метар не е само кај нас, туку во регионот и во цела Европа, но во периодот што следува се очекува намалување.
