Драма: Вооружена банда упадна во болница на Хаити – држат стотици заложници
Вооружена банда упадна во болница на Хаити и зеде како заложници стотици жени, деца и доенчиња, изјави директорот на болницата Хозе Улисе.
„Ние сме во голема неволја“, рече тој, пренесува АП.
Засега не се познати деталите за инцидентот и не е јасно зошто напаѓачите ги зеле пациентите како заложници. Улисе ги обвини членовите на т.н на бандата Бруклин предводена од Габриел Жан-Пјер, попознат како „Ти Габриел“. Тие се занимаваат со изнуда, киднапирање и насилство врз цивили, се наведува во извештајот на Обединетите нации.
Бандите низ Хаити се сè помоќни по атентатот на претседателот Џовенел Мојс во јули 2021 година, а бројот на киднапирања и убиства е во пораст, според американската агенција.
