Донесена првата пресуда за експлозијата во Бејрут

Судот во Лондон ја изрече првата пресуда за делумна одговорност за разорната експлозија во пристаништето Бејрут во август 2020 година, во која загинаа околу 250 луѓе.

Според извештајот на медиумите во Бејрут, Високиот суд на правдата во Лондон ја прогласил компанијата Саваро, регистрирана во Велика Британија, за одговорна за 250 смртни случаи предизвикани од експлозијата на 2.750 тони амониум нитрат, незаконски складиран со години во еден од хангарите во либанското пристаниште.

Според обвинението, британската компанија имала улога во набавката на експлозивен материјал пред неговото пристигнување во пристаништето Бејрут во 2013 година.

Се верува дека бројни компании и поединци од повеќе земји се одговорни на различни нивоа за експлозијата на 4 август 2020 година.

Адвокатската комора на Бејрут го тужеше Саваро во Велика Британија и веста за пресудата на лондонскиот суд им ја соопшти на медиумите, пренесува Танјуг, повикувајќи се на италијанската агенција АНСА.

Во Либан, судската истрага сè уште е „де факто“ замрзната, бидејќи некои високи политичари и припадници на безбедносниот апарат, директно вмешани како соодговорни за злосторството, ја попречуваа со политички и судски методи работата на судијата што ја води либанската истрага.

Во силната експлозија што на 4 август 2020 година одекна во Бејрут загинаа околу 250 луѓе, а повеќе од 6.000 луѓе беа повредени.