Донесена одлука: Во оваа европска земја ќе можете да возите 150 км на час!
Првата делница на која ќе се применува поголемата брзина ќе биде делот од чешкиот автопат Д3 помеѓу Табор и Ческе Будјовице.
Чешката управа за патишта и автопати (ŘSD) во моментов води тендер за снабдувач на нова сообраќајна сигнализација. Договорот со избраниот понудувач треба да се потпише во март или април, а поставувањето на таблите ќе трае околу два месеци. Се очекува новите табли да бидат поставени на крајот на јуни или почетокот на јули, пренесува Metropolitan.si.
Не секогаш ќе биде дозволена брзина од 150 km/h. Ограничувањето ќе зависи од временските услови и густината на сообраќајот, што ќе се покаже со флексибилна сообраќајна сигнализација која овозможува брза размена на информации.
Дирекцијата за патишта и автопати веќе ги проучува и другите делници каде што би можело да се зголеми ограничувањето на брзината. Меѓу потенцијалните кандидати се автопатот Д1 меѓу Преров и Острава и Д11 кај Храдец Кралове. Сепак, тие прво ќе ги анализираат резултатите од тестот на Д3 пред да донесат дополнителни одлуки.
Чешкиот министер за транспорт Мартин Купка во интервју за чешката телевизија ČT24 истакна дека ќе процени како јавноста прифаќа поголемо ограничување на брзината и дали тоа ќе влијае на зголемувањето на бројот на сообраќајни несреќи.
Воведувањето поголема брзина на автопатите беше овозможено со законски измени од 2023 година. Последната промена на брзината на чешките автопати се случи во 1997 година, кога границата беше подигната од 120 km/h на 130 km/h.
Резултатите од тестот на автопатот Д3 ќе бидат клучни за идните одлуки за воведување поголеми брзини и на другите делници. Целта на тестот е да се утврди дали повисоката граница е компатибилна со безбедноста и ефикасноста на патниот сообраќај.
