ДОДИК ЗА ШМИТ: Ќе го гониме како ѕвер
Ќе формираме свој суд и обвинителство, а високиот претставник на меѓународната заедница во БиХ, Кристијан Шмит „ќе го гониме како ѕвер“, вели претседателот на Република Српска, Милорад Додик.
Додик, кој е и лидер на владејачкиот Сојуз на независни социјалдемократи (СНСД), призна дека за усвојување на новиот Устав на РС е потребно двотретинско мнозинство, кое владејачката коалиција во моментов го нема, па затоа е неопходна поддршката од опозициските пратеници.
Тој го критикуваше поранешниот висок претставник, Волфганг Петрич, тврдејќи дека неговите наметнати амандмани го направиле актуелниот Устав на РС „волја на странецот, а не на народот“.
Додик нагласи дека Република Српска никогаш не дала свој став за овие наметнати одлуки, посочувајќи дека пратениците во Парламентот на БиХ „не се РС“ и дека овој ентитет има подобра меѓународна позиција од порано.
Главниот град на РС би станал Бања Лука, наместо Сараево, додека Пале (Источно Сараево) би било прогласено за „престолнина“.
Според новиот нацрт-устав, РС добива право на самоопределување, се укинуваат Советот на народи и потпретседателите на ентитетот, како и државјанството на БиХ – оставајќи го само ентитетското државјанство. Предвидено е повторно формирање на Војска на РС, како и формирање Висок судски и обвинителски совет на ентитетско ниво.
Некои од највисоко рангираните републикански и демократски лидери во Конгресот испратија заедничко писмо до американскиот државен секретар Марко Рубио во кое изразија загриженост за, како што наведоа, „неодамнешните дејства на лидерот на ентитетот Република Српска Милорад Додик, кој со години е ангажиран во сецесионистички активности, предизвикувајќи ги државните институции во Босна и Херцеговина, поткопувајќи го Дејтонскиот договор и загрозувајќи ги територијалниот интегритет и етно-социјалната кохезија на земјата“.
Тие наведоа дека како одговор на оваа акција, САД, вклучително и за време на првата администрација на Трамп, вовеле санкции за Милорад Додик, како и за поединци и субјекти кои му помагале во неговите сецесионистички акти.
Тие додаваат дека Уставниот суд на БиХ го осудил Додик на една година затвор и му забранил да учествува во политиката шест години, како резултат на неговата одлука да спроведе неуставни закони, со кои се отфрла јурисдикцијата на Уставниот суд.
Во писмото посочуваат дека Додик потоа ветил дека ќе ја игнорира пресудата и ќе продолжи со својот сепаратистички план, што го навело да преземе чекори кон потенцијалното отцепување на Република Српска од Босна и Херцеговина.
