Доброволци од Кочани се бореа со пожарот во Виница: Еден пожарникар повреден од стопен шеќер, пуштен е на домашно лекување
Доброволното противпожарно друштво (ДПД) од Кочани синоќа се соочи со еден од најголемите предизвици во својата историја, учествувајќи во гаснењето на големиот пожар во фабриката „Макпрогрес“ во Виница. За жал, во текот на интервенцијата, еден нивен член се здобил со повреди.
Како што соопштија од ДПД Кочани, тие интервенирале на барање на Територијалната противпожарна единица од Виница, вклучувајќи се во акцијата со 12 пожарникари-доброволци и три противпожарни возила.
„Нашите екипи останаа на терен до доцна во ноќта, со максимални напори за локализирање на пожарот и спречување на негово понатамошно ширење“, се вели во соопштението на друштвото.
Во текот на опасната интервенција, еден од доброволците се здобил со изгореници предизвикани од растопен шеќер што истекувал од погоните.
Од ДПД Кочани информираат дека нивниот член веднаш добил лекарска помош, по што е констатирано дека е во стабилна состојба и е пуштен на домашно лекување. „Му посакуваме брзо и целосно закрепнување“, порачаа од друштвото.
