ДОБИ 20 ДЕНА ЗАТВОР: Босанец поради мрсен бурек се заканил во Будва дека ќе направи масакр полош од тој во Цетиње

Босанец се заканувал со масакр во Будва поради мрсен бурек. 

М. К. (46) е осуден на затворска казна од 20 дена затоа што утринава се заканувал дека ќе убие жена и работник во пекарница во Будва.

Како што дознава „Вјести“, судијката на Судот за помали прекршоци во Будва, Магдалена Мијиќ, му изрече затворска казна, која веднаш ќе биде извршена.

Државјанинот на БиХ, утринава, околу 3.30 часот, бил во пекарницата и побарал да биде послужен по што незадоволен од услугата почнал да ѝ се заканува и да ја навредува вработената и ја опцул неколкупати.

„Јави се кај газдата, ќе викнам полиција, ќе ве запалам, сето ова ќе изгори, сакаш ли да ми ги отруеш децата затоа што бурекот е многу мрсен, дали сакаш да ме отруеш“, се заканил.

Еден час подоцна, околу 4.20 часот, државјанинот на БиХ се заканил и кон вработен.

 „Сакаш да ме отруеш, ќе ве запалам сите, ќе ве убијам, тоа убиство во Цетиње ќе биде мала работа“, рекол тој мислејќи на масакрот извршен од Ацо Мартиновиќ на 1 јануари.

Во масакрот во Цетиње, загинаа 12 луѓе. Меѓу нив имаше и деца.