До крајот на неделата ќе биде оценет обвинителниот акт за пожарот во „Пулс“
Основниот кривичен суд Скопје соопшти дека до крајот на неделата се очекува да заврши оцената на обвинителниот акт за пожарот во дискотеката „Пулс“ во Кочани, во кој се опфатени 37 обвинети – правни и физички лица застапувани од 33 бранители и претставници.
Судот информира дека сите обвинети и нивните адвокати веќе го имаат примено обвинителниот акт, а законските рокови за поднесување и доставување приговори истекуваат на 3 октомври.
Од Судот потсетуваат дека од приемот на обвинителниот акт биле ангажирани сите расположливи ресурси за неговата достава и прием на приговорите, но дел од адвокатите и претставниците на правните лица биле отсутни од своите канцеларии, поради што постапката се одолговлекла.
„Судот ги прави сите напори да ги исполни законските обврски и доследно да ги почитува правата на странките со цел да не се компромитира предметот во понатамошниот дел од постапката“, стои во соопштението.
