До 16 часот излезноста на изборите во Русија беше над 70 отсто
Излезноста на гласачите на руските претседателски избори денеска до 16 часот по московско време надмина 70 отсто – на гласање излегле 70,01, покажуваат податоците на веб-страницата на Централната изборна комисија.
РИА Новости пренесува дека „во новите региони на Русија, каде за прв пат се одржаа претседателските избори, избирачките места се веќе затворени“.
„Во сите четири региони одѕивот на гласачите надмина 80 отсто“, наведува московската агенција.
Над 1.300 луѓе излегоа на гласање во Хелсинки, рускиот амбасадор во Шпанија Јуриј Клименко извести дека на изборите учествувале околу 1.000 Руси, а активно се гласа во Египет и во САД.
Според портпаролката на Министерството за надворешни работи, Марија Захарова, до недела наутро 125.428 Руси гласале во странство на претседателските избори на 230 избирачки места во 111 земји, а претходно гласале околу 2,6 милиони луѓе.
Во трката за функцијата шеф на државата се четворица кандидати – Леонид Слуцки, Николај Харитонов, Владислав Даванков и Владимир Путин, кој важи за апсолутен фаворит.