Дневно околу 25.000 лица влегуваат во Грција преку граничниот премин Богородица/Евзони
Преку граничниот премин Евзони/Богородица, дневно минуваат приближно 25.000 лица, а околу 15.000 ја напуштаат земјата. Ова го изјави претседателот на полициските службеници од Кукуш (Килкис), Плутархос Елефтериадис, за грчката државна телевизија ЕРТ,
Во прилогот од граничниот премин, ЕРТ коментира дека секојдневно има метеж на Евзони со туристи од Балканот кои ја посетуваат северна Грција. Претседателот на полициските службеници објаснува дека тие се обидуваат да одговорат на зголемениот проток на возила и потенцира дека само во текот на изминатиот викенд околу 50.000 туристи влегле кај јужниот сосед преку конкретниот граничен премин.
Елефтериадис додаде дека оваа година има дополнителен број полициски службеници и се отворени девет шалтери за влез во Грција и шест за излез. “Позитивно е што оваа година имавме мало зајакнување и ова многу помогна и за да биде одморен полицискиот персонал што работи секојдневно”, посочи тој.
Според ЕРТ, за време на летната сезона на граничниот премин Евзони се ангажирани полицајци од северна Грција, а нивниот број достигнува до 65. Во секоја смена од грчка страна работат 12 до 18 полициски службеници поради зголемениот број туристи.
