ДКСК со препораки и забрани за време на Локалните избори 2025
Државната комисија за спречување на корупцијата (ДКСК) издаде соопштение со кое ги информира државните институции, политичките партии и јавноста за законските ограничувања во користењето на буџетски средства и државен капитал во периодот од распишувањето на Локалните избори 2025 до нивното завршување.
Меѓу главните забрани се: започнување нови инвестиции со државни пари, вонредни исплати и отуѓување на државен капитал, нови вработувања или отпуштања (освен во итни случаи), користење на државни ресурси за изборна кампања, прибирање средства од незаконски или анонимни извори и поткуп на гласачи.
Исто така, 20 дена пред почетокот на кампањата е забрането одржување јавни настани за пуштање во употреба на објекти финансирани со јавни средства, како и користење службени простории, опрема и возила за партиски цели. Министерството за финансии е должно јавно да ги објавува сите буџетски исплати (освен редовните плати, пензии и комунални трошоци) и да поднесе предизборен финансиски извештај.
ДКСК најавува дека ќе го следи целиот изборен процес, ќе постапува по сомневања за прекршувања и ќе ги известува надлежните органи. Комисијата ги охрабрува граѓаните и медиумите да пријавуваат случаи на прекршување на Законот за спречување на корупцијата и Изборниот законик.
