Директорот на „Пошта“ бара 5 милиони евра помош од Владата

Генералниот директор на Македонски пошти, Орхан Куртиши во интервјуто за Алсат потенцира дека од Владата побарале 5 милиони евра за излез од финансиската криза. Владата не предвидува приватизација на Поштата, додека Физибилити студијата за која се потрошени 800 илјади евра е неупотреблива.

„Побаравме околу 5 милиони евра. Се уште немаме одговор, но ова е привремен излез од кризата. Треба да го следиме примерот на Србија, каде што една година владата застана зад Поштата на Србија таму и и даде финансиска поддршка од 20 или 25 милиони евра. Што се однесува до физибилити студијата, таа всушност седи во фиоките на Поштата, никој не се занимавал со неа. Почнав да ја читам, да видам што замислиле таму, но реалната состојба и напишаното се во конфликт меѓу себе“, рече Куртиши.

Тој додаде дека добил уверување од министерот за транспорт Александар Николоски дека нема да се бара приватен партнер.

„Можам слободно да кажам дека во дискусијата и разговорите што ги имав со министерот, тој ја изрази својата подготвеност Поштата да остане за граѓаните на Република Северна Македонија“, изјави Куртиши.