Директорот на ЈП Водовод – Струга поднесе оставка – пет дена од чешмите тече темнокафеава и заматена вода
Петти ден по ред водата од градскиот водовод во Струга е забранета за употреба, откако од чешмите почна да тече темнокафеава и заматена вода. Поради сериозноста на состојбата, директорот на ЈП „Водовод“ Струга, Меџијаит Јусуфоски, денеска поднесе оставка од морални причини.
„Се работи за голема катастрофа, еколошка катастрофа по здравјето на граѓаните, сите школи, деца, градинки. Јас сум во фирмата 43 години, не се памети вакво заматување на водата. Водата била бистра, чиста. Сме имале во минатото и проблеми, но тие се решиле. Сега ги информирав и замолив сите институции, но моите надлежности како в.д. директор се до тука. Во истиот момент јас давам оставка”, вели Јусуфоски.
Тој информира дека веднаш биле известени сите надлежни институции за да се утврдат причините за загадувањето, по што е издадено официјално известување дека водата не е исправна за користење.
Според првичните анализи на Центарот за јавно здравје, заматеноста на водата е дури 30 пати над дозволеното ниво. Водата е прогласена за технички неисправна и не смее да се користи ниту за пиење, ниту за готвење, ниту за лична хигиена.
„Направив мониторинг на терен и констатирав дека водата во изворот Шум е буквално како кал. Мерењата во куќите и училиштата потврдуваат екстремна заматеност. Ситуацијата е сериозна. На стружани им преостанува да купуваат флаширана вода или, во краен случај, да користат езерска вода за одржување хигиена“, изјави Лидија Симонска од Центарот за јавно здравје.
Полицијата и инспекторите од Агенцијата за храна и ветеринарство вршат увид кај изворот Шум, кој е главен извор за водоснабдување на градот, и работат на утврдување на причините за загадувањето.
Од СВР Охрид информираат дека досега не е добиена официјална пријава од надлежното јавно претпријатие во Струга за загадување на изворите во селото Шум, но дека се преземаат мерки.
„До овој момент, во ОВР Струга не е добиена официјална пријава од надлежно јавно претпријатие во Струга за водоснабдување за загаденост на изворите за вода лоцирани во струшкото село Шум. ОВР Струга, во содејство со повеќе надлежни институции презема интензивни мерки со цел откривање на причините за загаденоста на водата и откривање на сторители на кривични дела. По завршување на сите мерки и активности, ОВР Струга до надлежното Јавно обвинителство ќе достави соодветен поднесок“, велат од СВР Охрид.
Во меѓувреме, граѓаните реагираат дека се принудени да купуваат флаширана вода, што дополнително ги оптоварува домашните буџети.
