Директорот Чибишев: Аферата „Онкологија“ не е случајно непозната на државните институции, инволвираните мора да добијат казна
Аферата „Онкологија“ ќе остане голем товар за македонското здравство, изјави директорот Чибишев, истакнувајќи дека не е можно надлежните институции да не биле информирани за неправилностите во Институтот за јавно здравје и Клиниките.
Тој појасни дека државната здравствена инспекција (ДЗСИ) постојано врши контроли, а и Фондот за здравствено осигурување секои шест месеци прави финансиски прегледи на трошоците во здравствените установи. Министерството за здравство, како што рече, има свој тим кој го следи работењето, особено на Клиниките каде што се слева најголемиот број пациенти.
„Не е можно да не знаеле за одлевањето на средства и несоодветното трошење“, истакна Чибишев.
Тој изрази надеж дека аферата ќе има епилог и дека сите инволвирани ќе добијат заслужени казни.
Анкетната комисија, според него, завршила голема работа и го насочила проблемот кон конкретен случај, што резултирало со обвинение. Чибишев потенцира дека вештачењата направени надвор од државата се објективни и независни, и дека наводите во јавноста за неправилно третирање на пациенти и злоупотреба на средства се реални и сериозни.
„Грозоморно е да се помисли дека пациентите, кои биле животозагрозени, биле излажани дека добиваат терапија, а не добивале ништо“, рече директорот.
Тој ги повика судските органи да ја продолжат истрагата до крај и да ги казнат сите виновни, што, според него, може да помогне во враќањето на довербата во јавното здравство.
