Димитриевски: Извесно е дека ЗНАМ ќе има свој кандидат во Центар поддржан од ВМРО-ДПМНЕ
Лидерот на ЗНАМ и градоначалник на Куманово, Максим Димитриевски, изјави дека е извесна поддршката од ВМРО-ДПМНЕ за кандидатите на ЗНАМ уште во првиот изборен круг во Куманово и Општина Центар.
Тој рече дека неговата кандидатура за Куманово сè уште не е формално потврдена, а за Центар се анкетираат неколку имиња, меѓу кои и заменик-министерот за енергетика, Мирослав Лабудовиќ.
„Господинот Лабудовиќ е едно од имињата за кое во моментов правиме мерења, ќе почекаме да завршат истите и секако тоа да го договориме со нашиот владин партнер од кој очекуваме поддршка на нашиот кандидат во Центар и во останатите општини, бидејќи ќе следува реципроцитет и за Град Скопје и за останатите општини кадешто ЗНАМ ќе нема кандидат, да ги повика своите поддржувачи да ги поддржат нашите партнери во коалицијата на централно ниво“, вели Димитриевски.
И премиерот Мицкоски потврди дека разговорите се во тек и најави повеќе информации во втората половина од август.
