ДИК ГО ЗАКЛУЧИ ИЗБИРАЧКИОТ СПИСОК: Право на глас на локалните избори ќе имаат 1.717.803 граѓани
Државната изборна комисија (ДИК) денеска го стави финалниот печат на Избирачкиот список за претстојните локални избори, според кој правото на глас во земјава ќе можат да го остварат вкупно 1.717.803 граѓани. Првиот изборен круг е закажан за 19-ти октомври, а вториот ќе се одржи на 2-ри ноември.
Според официјалните податоци, во посебниот извод од Избирачкиот список се запишани и 112.000 македонски државјани кои се на привремена работа во странство. Дополнително, своето право на глас ќе можат да го остварат и над 2.500 лица кои се наоѓаат во затворите и во старечките домови.
Гласањето на локалните избори ќе се спроведе на вкупно 3.480 избирачки места низ целата држава.
Како специфичен предизвик, ДИК регистрирала 132 избирачки места на кои се запишани помалку од 10 гласачи. За овие граѓани, Комисијата усвоила посебно упатство со кое детално се регулира начинот на кој тие ќе можат да гласаат.
До овој момент, до Државната изборна комисија се поднесени четири барања за акредитација на набљудувачи за изборниот процес.
