ДИК го усвои упатството за бројот на советници во општините и Град Скопје
Државната изборна комисија (ДИК) денеска попладне го усвои упатството за бројот на советници во советите на општините и во Советот на Град Скопје. Со тоа Комисијата ја продолжи работата по четвртата точка од дневниот ред на 130. седница.
Од правната служба на ДИК претходно било доставено писмено мислење по барање на членот Дитмире Шеху.
При гласањето за предлог-упатството за пополнување на образец на листи за членови на советите, петмина членови на ДИК гласаа „за“, а еден беше „против“.
„Согласно Изборниот законик и Деловникот, ДИК одлучува со мнозинство гласови. Од вкупно седум избрани членови, на седницата присуствуваа шест – петмина гласаа ‘за’, еден ‘против’. Затоа одлуката е донесена со потребното мнозинство. На првата седница имаше иницијатива да се гласа со консензус, но откако тоа не беше прифатено и по добиеното мислење, немаме законски основ да бараме консензус, туку одлучуваме со мнозинство“, изјави претседателот Борис Кондарко, одговарајќи на забелешките на Шеху.
Тој потсети дека, согласно Изборниот законик, член на ДИК кој има спротивно мислење има право да поднесе тужба до Управниот суд, како редовен правен лек против донесената одлука.
