Девет загинати, 54 повредени во руски напад врз Киев
Најмалку девет лица загинаа, а 54 се ранети во руските напади рано во четвртокот врз украинскиот главен град, соопштија официјални лица.
Градоначалникот на Киев, Виталиј Кличко, на Телеграм објави дека многу градски области биле погодени од нападите.
Според него, 38 повредени се префрлени во болници, додека на 16 лица им била укажана помош на лице место.
Шефот на Воената управа на градот Киев, Тимур Ткаченко, на Телеграм изјави дека главниот град бил погоден со комбиниран напад со балистички ракети од повеќе правци, како и со беспилотни летала (дронови).
Кличко ги повика граѓаните да останат во засолништа, посочувајќи дека украинската воздушна одбрана работи на одбивање на нападот.
Според украинските власти, најголема штета претрпела областа Свјатошински, каде избувнале шест пожари. Во извештаите се наведува дека луѓе се затрупани под урнатините на најмалку една станбена зграда, каде што биле испратени спасувачи и медицински тимови.
Во областа Холосивски, според властите, беспилотно летало паднало во близина на станбена зграда, предизвикувајќи пожар во гаражи и возила.
Ткаченко предупреди дека заканата ќе трае уште неколку часа, додека единиците за противвоздушна одбрана продолжуваат со своите операции.
Руската страна не ги коментираше нападите.
Нападот се случи додека продолжуваат дипломатските напори за можни мировни преговори меѓу Украина и Русија.
