Детали за обвинението против Трамп: Еве за што е обвинет екс американскиот претседател
Поранешниот американски претседател Доналд Трамп беше формално уапсен денеска во судницата на Менхетен и се појави на суд, каде што се изјасни за невин по сите 34 точки од обвинението поврзани со шема за криење пари за време на изборите во 2016 година.
По сослушувањето тој ја напушти судската зграда и се упати кон својот дом на Флорида.
Историското обвинение против поранешниот претседател Доналд Трамп е отпечатено и сега е јавно. Државното обвинителство на Њујорк штотуку го објави на својата веб-страница.
Во обвинението против Доналд Трамп се наведува дека поранешниот претседател бил вмешан во заговор за поткопување на интегритетот на изборите во 2016 година.
Обвинителите тврдеа дека Трамп бил дел од незаконска шема за потиснување на негативни информации – вклучително и незаконско плаќање од 130.000 долари наредено од обвинетиот за да се прикријат информациите што би ѝ наштетиле на неговата кампања.
Во обвинението се наведува дека причината поради која го сторил кривичното дело фалсификување деловни книги делумно е „промовирање на својата кандидатура“.
