Деспотовски: СДСМ имала и ќе има многу поголеми личности од актуелниот претседател
Откако денеска СДСМ преку сооопштение најави дека ќе бара исклучување на Јован Деспотовски од партијата затоа што, според нив, „ја продал партијата за пари“ и „бил петтоколонаш“ со своја реакција се јави и самиот Деспотовски.
Тој, вели дека по 30 години политички стаж не очекувал неговата матична партија да го остави целосно без зборови и коментар.
„Во сите јавни настапи сум бил максимално умерен дури и во ситуации и за луѓе кои апсолутно заслужиле остар став. Ако таа умереност сега станува закана за актуелниот партиски врв тогаш СДСМ има многу поголем проблем отколку што и мислиме.
СДСМ имала и ќе има многу поголеми личности од актуелниот претседател. И, никој од нив никогаш не се ставил над партијата, над нашето семејство. Тоа не е СДСМ, ниту некогаш ќе биде. Една лична порака за крај или за почеток – Венко, со една одлука не можеш, ниту ќе дозволам да избришеш 30 години работа, љубов и жртва“ пишува Деспотовски на социјалните мрежи.
Инаку, Деспотовски кој доаѓа од општинскиот огранок од Карпош беше и противкандидат на Венко Филипче на последните внатрепартиски избори.
