Десет активни пожари низ Македонија, најкритичен е пожарот во „Јасен“
Денеска низ земјава се регистрирани 10 пожари на отворен простор, а најкритичен е пожарот во ловиштето „Јасен“. Активен е и еден крак од пожарот во село Јажинце, општина Јегуновце, како и два пожари во Липково, во селата Лојане и Слупчане, каде интервенираат кумановските пожарникари. Еден пожар е активен и во Лозово, со интервенција на велешките пожарникари, информира директорот на Дирекцијата за заштита и спасување (ДЗС), Стојанче Ангелов.
Во текот на ноќта пожарот во „Јасен“ беше запрен пред да го загрози селото Брезница, благодарение на интервенцијата на припадниците на Единицата за брзо распоредување (ЕБР), пожарникари од Македонски Брод и вработените во „Јасен“. Вториот крак на пожарот рано утрово беше делумно ставен под контрола со помош на армиските специјалци „Волци“ и „Ренџери“.
Најголем проблем останува третата насока кон езерото Козјак, каде со помош на армиските сили се очекува спречување на понатамошното ширење. Во Јажинце пожарот се движи кон селата Долно Орашје и Радуша, а наскоро ќе се вклучи и армиски хеликоптер.
Ангелов апелираше до граѓаните, земјоделците и сточарите да бидат внимателни и да избегнуваат било какви активности кои би можеле да предизвикаат нови пожари.
