Демократскиот сојуз бара забрана за производство на канабис за медицински цели
Демократскиот сојуз повикува на итна интервенција од законодавниот дом за да се забрани производство на канабис за медицински цели. Партијата бара Собранието да донесе измена на релевантните закони по скратена постапка.
„Од 2017 година, Министерството за здравство, заедно со други надлежни институции, издало 61 лиценца за фирми кои можеле да произведуваат канабис за медицински цели. Сепак, контролата не функционираше како што треба, што доведе до фингирани кражби, пресметки меѓу наркомафии, заплени од полицијата, но криминалниот бизнис продолжи. Наркомафијата, во која беа вклучени и носители на високи државни функции од претходната власт, стекна огромна финансиска моќ и политичко влијание“, се наведува во соопштението на партијата.
Демократскиот сојуз ја поддржува акцијата на МВР за заплена на канабис и инсистира таа да се спроведува неселективно.
„Јавно да се објават сопствениците – формални и неформални – на фирмите кои произведуваат канабис, како и податоците за лиценците: кој и кога ги издал. Министерството за здравство заедно со другите надлежни институции треба да објави колку количини на канабис се произведени, каде се тие (продадени, на залиха, украдени) и колку профит е остварен. Запленетите 32 тони канабис (5 во Србија и 27 тони во Македонија) се само површински показател за големината на овој наркобизнис, кој има сериозни последици по здравјето на младите генерации, политичката стабилност, владеење на правото и меѓународниот углед на државата“, истакнува Демократскиот сојуз.
Партијата бара одговорност и од функционерите во надлежните министерства кои издавале лиценци и не ја спровеле контролата согласно законите, со цел да се спречат понатамошни злоупотреби.
„Одземените количини се премногу за Балканот и далеку над потребите за медицински цели во Македонија. Очигледно е дека првобитната хумана цел е злоупотребена, затоа се потребни итни законски промени“, заклучува Демократскиот сојуз.
