Демант од Фарма Трејд: Немаме сторено никаков прекршок
ПРЕДМЕТ: БАРАЊЕ ЗА ДЕМАНТ И ПОВЛЕКУВАЊЕ НА ТЕКСТ СО НАСЛОВ
„КАРТЕЛИ: Трговци со инсулин во Македонија лани казнети со 110 милиони денари“
На ден 12.04.2023 година на интернет порталот www.faktor.mk објавивте текст со наслов
„КАРТЕЛИ: Трговци со инсулин во Македонија лани казнети со 110 милиони денари“. Со
објавениот текст, а со цел да се стигне до сензационална вест, се создава погрешна слика, далеку
од вистината, притоа без да побарате наш став и изјава, како засегната страна која во повеќе
наврати се споменува во наведениот текст.
Согласно со сите стандарди и правила кои важат и се применуваат во новинарската
професија пред објавување на информација од каков било вид, потребно е да биде проверена низ
призмата на двете засегнати страни, а не тоа да биде врз основа на објаснување само од едната
страна.
Доколку подетално го истражевте случајот или пак, побаравте изјава од нас, децидно ќе
потенциравме дека со правосилна пресуда на Управниот суд утврдено е дека Друштвото ФАРМА
ТРЕЈД ДООЕЛ увоз-извоз Скопје ги нема повредено законските одредби од Законот за заштита
на конкуренцијата, па следствено на тоа нема сторено никаков прекршок како што тврдите во
објавениот текст.
Друштвото ФАРМА ТРЕЈД ДООЕЛ увоз-извоз Скопје е трговско друштво со
долгогодишна традиција и реноме, како на македонскиот, така и на странскиот пазар. Застапници
сме на странски фармацевтски производители и сме редовен учесник во постапките за јавни
набавки на фармацевтски производи и лекови. Успешно сме реализирале голем број договори за
јавна набавка склучени со јавните здравствени установи, со крајна цел, доброто на нашите
граѓани.
Со објавата на гореспоменатиот текст, базиран на непотврдени и неточни факти, се врши
директен атак врз името и угледот на Друштвото ФАРМА ТРЕЈД ДООЕЛ Скопје. Поради тоа Ве
повикуваме да го остраните штетниот текст од вашиот интернет портал, а воедно и да го објавите
овој демант.
Се надеваме дека ќе постапите навремено и професионално по ова наше барање, во
спротивно ќе бидеме принудени да преземеме законски дејствија против Вас за заштита на името
и угледот на нашата компанија.
