ДЕЛОВИ ОД БОСНА ВО МРАК: Без струја останаа 200.000 домаќинства

Снежното невреме остави во мрак многу семејства. Најтешка е состојбата во Унско-санскиот кантон, односно во Бихаќ, Босанска Крупа, Цазин, Сански Мост и Велика Кладуша.  Прекинот во снабдувањето со електрична енергија е предизвикан од паѓање на гранки и дрвја на столбовите, како и поради кршење на спроводници под тежината на снегот.

Околу 200,000 домови во северозападниот дел на Босна и Херцеговина (БиХ) денеска останаа без струја поради дефекти.

Електропривреда БиХ од Федерацијата БиХ соопшти дека од 04:00 до 10:30 часот без напојување со електрична енергија останале приближно 180,000 корисници

„Благодарение на брзите интервенции на екипите за електрична инсталација, повеќето дефекти се санирани и во моментов околу 60,000 корисници се без струја“, соопшти Електропривреда БиХ.

Електрокраина од Република Српска соопшти дека снежните врнежи предизвикале дефекти на повеќе од 50 среднонапонски далноводи во дистрибутивната област на таа компанија.

Во Хрватска, Албанија, но и во Македонија, снегот го отежна сообраќајот.